Hólmbert: Ég labba ekkert inn í liðið

„Mér líður mjög vel og ég er líka svolítið stressaður. Þetta er risaskref fyrir mig,“ segir Hólmbert Aron Friðjónsson sem í gær skrifaði undir fjögurra ára samning við skoska stórliðið Celtic.

Þessi tvítugi framherji sló í gegn með Fram í Pepsi-deildinni í sumar og er nú kominn til besta liðs Skotlands sem tekur árlega þátt í Meistaradeildinni.

„Ég fer út 4. desember og kem svo heim um jólin. Fer svo aftur út rétt fyrir áramót. Þetta verður mikil barátta og ég þarf að leggja hart að mér. Ég fæ vonandi tækifæri ef ég verð duglegur og stend mig vel á æfingum.“

Þjálfari liðsins er harðjaxlinn Neil Lennon og Hólmbert segist hafa átt gott spjall við hann.

„Hann er mjög ánægður með mig og vill fá mig í hópinn sem fyrst. Hann segist hlakka til að fá mig og vonandi fæ ég bara að spila sem fyrst fyrir hann,“ segir Hólmbert en hann gerir sér grein fyrir því að samkeppnin er mikil.

„Ég labba ekkert inn í liðið, ég veit það vel. Ég mun setja mér markmið á næstu dögum en ég vil fá að spila.“

Framherjinn ungi segir að síðustu dagar hafi verið mikið ævintýri.

„Þetta er búið að vera svakalegt. Gott að þessi mál eru öll í höfn. Ég er svona smám saman að meðtaka það sem var að gerast. Þetta er bara alveg frábært.“