Dómarar verða með úðabrúsa á HM félagsliða

Ein skemmtilegasta uppfinningin í fótboltanum lengi eru úðabrúsarnir sem dómarar hafa á stundum notað síðustu ár. Þessir brúsar verða í notkun á heimsmeistarakeppni félagsliða í næsta mánuði.

Brúsarnir eru mjög sniðugur því línan sem búin er til hverfur á einni mínútu. Dómarar geta því notað brúsann til þess að merkja hvar eigi að taka aukaspyrnu og hvar varnarveggur eigi að standa.

Það var fyrst prófað að nota þessa brúsa í Argentínu árið 2008. Þeir slógu svo endanlega í gegn á Copa America árið 2011. Síðan hafa úðabrúsarnir verið notaðir víða.

Dómarar segja að afar góð reynsla sé af þessum brúsum og það heyri nánast sögunni til að leikmenn í varnarvegg séu spjaldaðir í leikjum sem brúsarnir eru notaðir. Leikmenn stígi ekkert yfir línuna.

Ekki hefur verið útilokað að nota þessa brúsa á HM næsta sumar.