Óttast að hundruð séu látnir í Naíróbí

AP fréttastofan skýrir frá því að starfsfólk við líkhúsið í Naíróbí, höfuðborg Kenía, sé í óða önn að búa sig undir að taka á móti fjölmörgum líkum til viðbótar frá verslunarmiðstöðinni Westgate.

Öryggissveitir landsins, bæði her og lögregla, réðust í gær til inngöngu í verslunarmiðstöðina, þar sem hópur vopnaðra manna hafði haldið fólki í gíslingu síðan á laugardag.

Opinberlega hafa stjórnvöld í Kenía staðfest að átökin hafi kostað 62 manns lífið, að og eru þá tveir gíslatökumenn meðtaldir. Lík þeirra hafa þegar verið flutt í líkhús.

Um tíu manns voru handteknir í gær, en í morgun voru enn nokkrir árásarmannanna inni í verslunarmiðstöðinni og var talið að þeir væru með nokkra tugi gísla enn á valdi sínu.

Óttast er að hundruð manna hafi látið lífið í umsátrinu.

AP- fréttastofan hefur eftir bróður eins þeirra hermanna, sem tekið hafa þátt í aðgerðunum, að fjölmörg lík séu ennþá inni í í verslunarmiðstöðinni.