Sjálfboðaliðum Rauða krossins rænt

Sjö hjálparstarfsmönnum Alþjóða Rauða krossins var í gær rænt af vopnuðum mönnum í borginni Idlib í norðvesturhluta Sýrlands. Sex þeirra eru fulltrúar Alþjóðaráðs Rauða krossins og einn er starfsmaður Rauða hálfmánans. Óljóst er hverjir standa á bak við ránið og hvort þeir gera einhverjar kröfur.

Þórir Guðmundsson, sviðsstjóri hjálparstarfssviðs Rauða krossins á Íslandi, segir Alþjóða Rauða krossinn ekki hafa sent frá sér neinar upplýsingar um málið. Hann segir mjög alvarlegt þegar svona lagað gerist þar sem víðast hvar sé hlutleysi Rauða krossins virt og viðurkennt. Það sé starfsaðferð Rauða krossins að vera í góðu sambandi við deiluaðila þar sem þeir eru á ferð á átakasvæðum til að tryggja öryggi sjálfboðaliða sinna.

Alþjóðaráð Rauða krossins hefur gert þá kröfu á Facebook síðu sinni að starfsmennirnir sjö verði tafar- og skilyrðislaust leystir úr haldi.