Hrafnista hefur vínsölu í Hafnarfirði

„Viðtökurnar hafa verið hreint út sagt gríðarlega góðar,“ segir Pétur Magnússon, forstjóri Hrafnistu, um rekstur kaffihúss með vínveitingum á hjúkrunarheimilinu í Reykjavík. Hefja á sams konar rekstur í Hafnarfirði.

Íbúar sem Fréttablaðið hitti á kaffistofunni í Hafnarfirði í gær voru himinlifandi með fyrirætlanirnar. „Við tröllum á meðan við tórum,“ sagði Úlfar Garðar Randversson, sem getur ekki beðið eftir dælunni.



Pétur segir afar vel hafa tekist til með kaffihúsið Skálafell sem opnaði í Hrafnistu í Laugarásnum fyrir rúmu ári.

„Það er mikil ánægja með framtakið, bæði hjá heimilisfólki og ættingjum,“ segir forstjórinn og undirstrikar að í raun sé Skálafell hefðbundið íslenskt kaffihús sem selur kaffi, súkkulaðitertur og pönnukökur, auk þess að hafa fengið leyfi fyrir léttvíni og bjór. „Salan á léttvíni og bjór er reyndar ekki nema fimm prósent af heildarsölunni.“

Að sögn Péturs kom upp umræða í framhaldi af opnun Skálafells um að sams konar fyrirkomulag yrði á heimili Hrafnistu í Hafnarfirði. Nú sé undirbúningur að því langt kominn og vínveitingaleyfið sé fengið.

„Það er mikill velvilji hjá bæjarstjóranum að þetta gangi hratt og vel fyrir sig innan kerfis Hafnarfjarðarbæjar,“ segir Pétur, sem kveður aðstöðuna í Hafnafirði enn sem komið er fremur kaffihorn en kaffihús. „Það bíður þangað til við förum í stærri framkvæmdir að þetta verði virkilega grand kaffihús eins og Skálafellið í Reykjavík.“

Fyrirkomulagið í Hafnarfirði verður það sama og í Reykjavík hvað það varðar að veitingasalan er opin almenningi. „Hér getur hver sem er komið og keypt kökur og kaffidrykki og það verður boðið upp á léttvín og bjór eins og í Reykjavík,“ segir Pétur.

Hrafnista rekur einnig hjúkrunarheimili í Kópavogi sem er sambyggt þjónustumiðstöð sem bærinn rekur.

„Við höfum lagt fyrir bæinn tillögu um að opna kaffihús þar en höfum ekki fengið formleg svör frá bæjarstjórn Kópavogs,“ segir Pétur sem kveður þann kaffihúsarekstur geta verið hvort sem er á hendi Hrafnistu eða Kópavogsbæjar.

Nokkur umræða skapaðist í aðdraganda þess að vínveitingar hófust á Hrafnistu í Reykjavík. Aðspurður segir Pétur raddir um að heimilisfólkið myndi leggjast í áfengisneyslu ekki hafa reynst sannspáar. „Við höfðum sjálf ekki miklar áhyggjur af því, ekki frekar en gengur og gerist á öðrum kaffihúsum í landinu. Enda er hér bara venjulegt fólk,“ segir forstjóri Hrafnistu.