Engin hollusta á sjúkrahúsunum

Næringarfræðingur segir ómögulegt að nálgast hollan mat innan veggja sjúkrahúsa landsins. Sjúklingar, bæði þeir sem lagðir eru inn og þeir sem eru með minniháttar áverka, sem vilja hugsa um heilsuna hafi ekki tækifæri til þess að næra sig sómasamlega.

Geir Gunnar Markússon næringarfræðingur segir þetta skjóta skökku við. „Almennt, bæði á sjúkrahúsum og eins til dæmis í skólum, finnst mér þetta vera ljót markaðssetning, að hafa sjálfsala aðeins með óhollustu fyrir börn og sjúklinga. Það ætti auðvitað frekar að vera hollusta í boði. Það er næstum því jafnsorglegt og að sjá reykingamenn reykja fyrir utan spítala.“

Fann bara súkkulaði og gos

Hann segist sjálfur hafa reynslu af því að erfitt sé að nálgast hollustu á sjúkrahúsinu sé biðin löng. „Ég var uppi á bráðamóttöku um daginn og þurfti að bíða. Það var mikið að gera eins og gengur. Svo varð ég svangur og fór að leita að mat en fann aðeins súkkulaði og gos.“

Að hans mati er þetta einkennilegt fyrirkomulag sem verði að vekja athygli á. Hann segir sér umhugað um heilsuna og að hann hafi viljað borða hollan mat en aðstæður hafi ekki boðið upp á það.

„Bæði sjálfsalafyrirtækin og sjúkrahúsin bera ábyrgð á þessu. Stjórnendur spítalanna hljóta að bera ábyrgð á því hver selur vörurnar sínar á spítölunum. Ef þeir geta það ekki verður æðsti maður heilbrigðismála á Íslandi, velferðarráðherra, að setja reglur um þetta.“

Engin umræða um framboðið

„Spítalinn hefur ekki sett nein skilyrði um hvað er til sölu í verslunum spítalans eða sjálfsölum. Það hefur engin umræða verið uppi það,“ segir Ingólfur Þórisson, framkvæmdastjóri rekstrarsviðs Landspítalans. Hann bendir á að spítalinn reki mötuneyti sem öllum er velkomið að nýta sér. Það sé þó ekki opið allan sólarhringinn þar sem það lokar á kvöldin.

„Kvennadeild Rauða krossins rekur sjálfsalana og er með veitingasölu, þar sem er sælgæti og gos sem er jú ekki hollt en mér skilst að þar sé líka að fá samlokur og bakka.“

Hann segir langt síðan hann athugaði hvað í boði væri. „Þetta er alfarið á könnu líknarfélaganna.“

Veitingasala Kvennadeildar Rauða krossins er opin frá 10-16 alla virka daga og skemur um helgar eða milli 14 og 16. „Á kvöldin er ekkert nema þessir sjálfsalar,“ segir Ingólfur.