Nýir verjendur mæta með Sigurði og Ólafi

Nýir lögmenn munu mæta með Sigurði Einarssyni og Ólafi Ólafssyni í þinghald í Al Thani-máli sérstaks saksóknara í Héraðsdómi Reykjavíkur í dag. Skipaðir verjendur þeirra, Gestur Jónsson og Ragnar H. Hall, munu hins vegar ekki láta sjá sig.

Nýju lögmennirnir tveir eru Ólafur Eiríksson og Þórólfur Jónsson frá lögmannsstofunni Logos, og mun verða óskað eftir því við dómarann að Ólafur verði skipaður verjandi Sigurðar Einarssonar og Þórólfur verjandi Ólafs Ólafssonar. Fallist dómari á það mun hann síðan að líkindum fresta aðalmeðferðinni, sem átti að hefjast í dag, til að gefa nýjum verjendum færi á að kynna sér málavexti.

Gestur og Ragnar blésu til blaðamannafundar á mánudag þar sem þeir tilkynntu um þá ákvörðun sína að segja sig frá verjendastörfum í Al Thani-málinu. Þeir sögðust, sannfæringar sinnar vegna, ekki geta tekið þátt í málsmeðferð sem þeir teldu brjóta jafngróflega gegn rétti skjólstæðinga þeirra og raun bæri vitni. Ákvörðunin væri tekin í samráði við Sigurð og Ólaf.

Héraðsdómarinn Pétur Guðgeirsson brást hins vegar fljótur við og hafnaði beiðninni stuttu síðar; Gestur og Ragnar skyldu verja sína skjólstæðinga – annað mundi tefja málið um of.

Það hyggjast tvímenningarnir hins vegar ekki gera. Þeir ætla einfaldlega ekki að mæta, og allt útlit er fyrir að það muni fresta aðalmeðferð málsins um nokkrar vikur hið minnsta, jafnvel fram á haust.

Verði það raunin hefur það margvíslegar afleiðingar. Málið er mun umfangsmeira en þau mál sérstaks saksóknara sem þegar hefur verið réttað í og til stóð að aðalmeðferð þess tæki átta daga. Þrír dómarar höfðu skipulagt störf sín með það í huga langt fram í tímann og stærsti salurinn í Héraðsdómi Reykjavíkur verið tekinn frá undir réttarhöldin.

Þá höfðu um fimmtíu vitni verið boðuð til skýrslugjafar með margra mánaða fyrirvara. Sum þeirra eru þegar komin frá útlöndum til að bera vitni í málinu. Kostnaður vegna þessa fellur á ríkið.