Ekki allir svo heppnir að hafa handboltann

Björgvin Páll Gústavsson, landsliðsmarkvörður í handbolta, er verndari samtakanna Lífsýn sem starfa fyrir börn á grunnskólaaldri sem eiga í félagslegum erfiðleikum.

Samtökin eiga þessa dagana undir högg að sækja. Þau eru staðsett í húsnæði á móti Kópavogsskóla en missa það 1. júní. "Við erum að leita að nýju húsnæði. Til að svona samtök geta rekið sig þarf að koma inn nægt fjármagn en til dæmis í síðasta mánuði höfðu þau ekki efni á leigunni og þess vegna er mikil barátta um hver mánaðarmót," segir Björgvin Páll, sem frétti fyrst af Lífsýn í lok síðasta árs.

"Mér var boðið í heimsókn að kíkja á aðstöðuna og ég var snortinn í minni fyrstu heimsókn. Þarna er verið að vinna ótrúlegt starf og þetta er eitthvað sem ég hefði klárlega þurft að nýta mér á mínum yngri árum en það eru ekki allir svo heppnir að hafa boltann til að bjarga sér," segir Björgvin Páll, sem spilar með Magdeburg í Þýskalandi. Tveir landsleikir við Slóvena eru einnig framundan með íslenska landsliðinu í byrjun apríl.

"Ég var gerður að verndara Lífsýnar vegna þess að þetta er málefni stendur mér mjög nærri og ég vil gera allt sem í mínu valdi stendur til að samtökin geta rekið sig áfram. Eitt af mínu verkefnum þessa stundina er að leita til fjársterkra aðila eða fyrirtækja sem geta lagt samtökunum lið og hjálpað okkur að hjálpa öðrum. Það yrði synd að þurfa að leggja svona starfsemi niður, sem hefur nú þegar bjargað mörgum mannslífum," segir hann en Elvar Bragason og Benedikt Guðmundsson eru mennirnir á bak við samtökin.

Björgvin Páll hefur fengið þekkta einstaklinga til að hitta krakkana og stappa í þá stálinu en margir þeirra hafa orðið fyrir einelti, hafa lítið sjálfstraust, hafa dottið úr skóla, eða hafa orðið á einhvern hátt útundan félagslega. "Þorgrímur Þráinsson kom í síðustu viku og hélt fyrirlestur og Logi Geirson ætlar að mæta eftir rúmar tvær vikur og peppa krakkana upp," segir hann og bætir við að Jón Jónsson ætli að aðstoða krakkana í Tónasmiðjunni, sem er stór hluti af samtökunum. Auk þess ætlar frjálsíþróttaþjálfarinn Silja Úlfarsdóttir að þjálfa krakkana með aðstoð Sporthússins. Einnig er reynt að hjálpa krökkunum með heimanámið þar sem kennararnir og þjálfarnir Hákon Sverrisson og Hilmar Rafn Kristinsson eru í fararbroddi. Verið er að leita að fleiri kennurum til að aðstoða. "Það er yndislegt að sjá hversu margir eru tilbúnir að aðstoða og gefa vinnu sína," segir Björgvin Páll. freyr@frettabladid.is