Tónlistin er dásamleg veira

„Málið er að ef maður hefur einu sinni náð tökum á tónlistinni og náð tökum á henni, þá lætur hún mann ekkert í friði. Ég verð ofsalega eirðarlaus ef ég kem ekki með einhverjum hætti að tónlist í smá tíma. Þetta er dásamleg veira," segir popparinn Geiri Sæm, sem hefur sent frá sér sitt fyrsta lag í áraraðir, eða síðan þriðja sólóplatan hans kom út árið 1991.

Lagið heitir Frá topp oní tær og er eins konar virðingarvottur við foreldra Geira, þau Sæmund Pálsson, betur þekktan sem Sæma rokk, og Ásgerði Ásgeirsdóttur. „Mig langaði hreinlega til að gera lag um þau. Þau hafa reynst mér mjög vel og samband þeirra er mjög fallegt. Pabbi hefur alltaf verið óskaplega góður við mömmu og er mjög góð fyrirmynd hvað þetta varðar, svo mér fannst þau tilvalið umfjöllunarefni," segir Geiri og bætir við að vegna textans um dansandi heiðurshjónin hafi honum þótt tilvalið að útsetja lagið í dálítið gamaldags rokkstíl með blásturshljóðfærum og öllu tilheyrandi.

Frá topp oní tær er þegar komið í spilun á útvarpsstöðvum og segir tónlistarmaðurinn að fleiri lögum verði varpað í spilun á næstunni. Endanlegt markmið sé þó að gera stóra plötu í samstarfi við Senu og vonast hann til að sú geti komið út á þessu ári. Aðspurður segir hann að vel geti gerst að spilamennska fylgi í kjölfarið. Þorvaldur Bjarni Þorvaldsson, sem spilaði með Geira í sveitinni Hunangstunglinu forðum daga, er Geira til halds og trausts þessa dagana og telur popparinn líklegt að hann hói saman fleiri gömlum félögum, bæti við einhverjum nýjum og búi til band í kringum dæmið.

Í kringum 1990 gaf Geiri út þrjár plötur, Fílinn, Er ást í tunglinu? og Jörð, sem nutu vinsælda en hann hefur haft hægar um sig síðustu árin. „Þetta er fáránlega langur tími, hvað á maður að segja?" spyr Geiri og hlær, en útskýrir svo að hann hafi búið erlendis um hríð auk þess að hafa samið stef í fullu starfi á tímabili og samið tónlist fyrir aðra, en þessa dagana starfar hann sem matreiðslumaður á Hrafnistu. „Svo er ég auðvitað fjölskyldumaður og barneignir og brauðstrit hafa tekið sinn tíma," segir hann.

Froðan, eitt af vinsælustu lögum Geira, náði efsta sæti vinsældalista seint á síðasta ári þegar Raggi Bjarna og Jón Jónsson gerðu nýja útgáfu af laginu. Geiri segir það frábært þegar lög öðlast endurnýjun lífdaga og hann fylgist vel með ungu popptónlistarfólki á Íslandi í dag. „Ég hef gríðarlega gaman af mörgum, til dæmis Retro Stefson og Ásgeiri Trausta. Ég hef líka sérlega gaman af Kiriyama Family og jafnvel stendur til að við gerum lag saman. Það er ýmislegt í gangi," segir Geiri og bætir við að það sé gaman að vera mættur aftur í slaginn.