Mamma hélt að ég yrði kynnir

"Það verður ekkert erfitt að halda sér vakandi, bara nokkrir kaffibollar og smá kría yfir daginn," segir fréttamaðurinn Freyr Gígja Gunnarsson. Hann lýsir Óskarsverðlaunaathöfninni í beinni útsendingu á Rúv á sunnudag. Athöfnin hefst um miðnætti og tekur rúmar fjórar klukkustundir.

Freyr Gígja hefur verið einlægur aðdáandi Hollywood-stjarnanna um árabil og er því ótæmandi viskubrunnur þegar kemur að þeirra högum. Hann viðurkennir þó fúslega að hann kvíði einnig fyrir kvöldinu. "Það verða örugglega einhverjir kvikmyndanirðir og áhugamenn um tísku sem munu fylgjast með hverju skrefi mínu og hverju orði, ég vona að ég komist hjá því að móðga þetta fólk. Ég er búinn að kynna mér tískuna töluvert og hvaða leikkonur eru líklegastar til að stela sviðsljósinu á rauða dreglinum. Það verður sérlega forvitnilegt að sjá hvaða litir verða ráðandi á dreglinum í ár."

Þegar móðir fjölmiðlamannsins fékk veður af því að hann ætti að lýsa athöfninni taldi hún í fyrstu að hann yrði kynnir á verðlaunahátíðinni sjálfri. "Hún hafði slíka tröllatrú á syni sínum að hún hélt að hann væri endanlega búinn að meika það og væri hreinlega á leiðinni til Los Angeles að kynna Óskarinn. Hún varð þó ekkert alltof vonsvikin þegar hún komst að því að ég væri bara að lýsa athöfninni í beinni frá myndverinu. En hver veit hvað framtíðin ber í skauti sér," segir hann og hlær.

Útvarpsmaðurinn Ívar Guðmundsson hefur lengi haft það hlutverk að lýsa Óskarsverðlaununum. Freyr segir að það verði erfitt að feta í fótspor hans, enda hafi Ívar sinnt starfinu óaðfinnanlega. "Ég ætla að vera fagmaður fram í fingurgóma og svo kemur bara í ljós hvort sú fagmennska reynist fyndin og skemmtileg líka," segir Freyr Gígja að lokum.