Flensan í rénun hér á landi

Tilkynningum um inflúensulík einkenni hefur fækkað mikið undanfarna viku og er inflúensan greinilega í rénun, að sögn landlæknisembættisins.

Flensufaraldurinn var heldur fyrr á ferðinni nú en undanfarin ár en virðist að öðru leyti hafa verið svipaður faröldrum síðustu ára. Flensan náði hámarki upp úr miðjum janúar, í þriðju til fimmtu viku ársins.

Ellefu einstaklingar greindust með staðfesta inflúensu samkvæmt veirufræðideild Landspítalans, að því er fram kemur á vef landlæknis. Sex þeirra reyndust vera með svínainflúensu, fjórir með inflúensu A og einn með inflúensu B. Þá greindust níu einstaklingar með RS-veirusýkingu í síðustu viku og er talið að veirusmitunum fari nú fækkandi.

Inflúensan er enn útbreidd víðast hvar í Evrópu, samkvæmt tölum frá Sóttvarnastofnun Evrópu. Þá er fjöldi tilvika talsvert meiri víðast en hér á landi og flensan enn að bæta í.

Landlæknisembættið minnir á að þó dregið hafi úr fjölda tilfella af inflúensu, RS-veiru og öðrum öndunarfæraveirum, dreifast þær áfram á milli manna. Því er fólk hvatt til að dvelja heima meðan það er veikt, hylja vit sín við hósta og hnerra og þvo sér vel um hendur.