Skuggalegri hliðar danstónlistar

Ný klúbbakvöld sem heita Reykjavík Sex Farm hefja göngu sína í Reykjavík á morgun. Skipuleggjandinn Bob Cluness hefur undanfarin ár getið sér gott orð sem yfirumsjónarmaður tónlistarhluta götublaðsins The Reykjavík Grapevine.

Hugmyndin varð til í góðra vina hópi. "Okkur fannst að, þótt tónlistar og næturlíf Reykjavíkur sé um margt frábært, þá er danstónlistin oft á tíðum af frekar skornum skammti. Hugmyndin vatt upp á sig í það að halda almennilegt klúbbakvöld," segir Cluness.

Hvert kvöld fyrir sig hefur sitt þema en skuggalegri hliðar danstónlistarinnar verða ávallt í fyrirrúmi. "Áherslan verður á drungalegum bassahljóðum sem fá ekki eins mikla spilun í hundrað og einum," segir Cluness. "Til dæmis nútíma bassatónlist frá Bretlandseyjum, grime og jackin'bass í bland við goth, industrial og hart teknó."

Nafn klúbbakvöldanna, Reykjavík Sex Farm, á rætur sínar að rekja til bloggs sem Cluness hefur haldið úti síðan 2010 og fjallar um strauma og stefnur bæði í erlendri og innlendri tónlist.

Fyrsta kvöldið kallast The Valentines Bass Massacre og verður haldið á Litlu gulu hænunni, Laugavegi 22. Plötusnúðar verða Karl Tryggvason (Breakbeat.is) og Kári Guðmundsson sem kemur fram undir nafninu Hypno.