Tvær stúlkur létust í bílslysi við Meðallandsveg

Tvær pólskar stúlkur létust í alvarlegu umferðarslysi á Suðurlandsvegi, skammt austan við Meðallandsveg, um þrjú leytið í gær. Stúlkurnar, sem voru fæddar árið 1997 og 1998, voru úrskurðaðar látnar á vettvangi þegar lífgunartilraunir, sem vegfarendur hófu en var haldið áfram af sjúkraliði, báru ekki árangur.

Ökumaður og farþegi í framsæti, karl og kona, voru flutt með þyrlum Landhelgisgæslunnar á slysadeild LSH og eru nú á gjörgæsludeild. Þau eru ekki talin í lífshættu. Fólkið er allt pólskir ríkisborgarar en stúlkurnar sem létust voru gestkomandi á Íslandi.

Bifreiðin sem fólkið var í fór út af veginum og fór nokkrar veltur og hafnaði á hvolfi. Stúlkurnar, sem voru farþegar í bílnum, köstuðust út úr honum. Eldur kviknaði í bifreiðinni.

Mikill viðbúnaður var vegna slyssins. Lögreglumenn frá lögreglunni á Hvolsvelli, staðsettir á Kirkjubæjarklaustri, auk lögreglumanns frá rannsóknardeild lögreglunnar á Selfossi komu á vettvang ásamt sérfræðingi í bíltæknirannsóknum. Einnig kom á vettvang slökkvilið frá Vík og Kirkjubæjarklaustri sem og sjúkrabílar frá Vík og Kirkjubæjarklaustri. Læknir frá Vík kom á staðinn auk þess sem björgunarsveitir í Skaftárhreppi aðstoðuðu við vinnu á vettvangi og við að loka umferð um Suðurlandsveg á meðan vinnu stóð. Umferð var beint um Meðallandsveg og Hrífunes á meðan lokunin stóð en vegurinn var opnaður um 18:30

Rannsókn á tildrögum slyssins stendur yfir en rannsóknardeild lögreglunnar á Selfossi fer með hana í samvinnu við lögregluna á Hvolsvelli.

Ekki er unnt að veita frekari upplýsingar um tildrög slyssins eða rannsókn þess að sinni.