Alfreð missir af öðrum leiknum í röð

Alfreð Finnbogson verður ekki með Heerenveen í hollensku úrvalsdeildinni um helgina en liðið mætir þá Go Ahead Eagles á heimavelli. Alfreð glímir enn við meiðsli aftan í læri og er ekki leikfær samkvæmt frétt á heimasíðu Voetbal.

Alfreð var ekki með á móti PSV Eindhoven um síðustu helgi en sá leikur endaði með 1-1 jafntefli. Sjúkraþjálfari liðsins talaði um það í viðtali við hollenska fjölmiðla að menn ætli að fara varlega með Alfreð.

Alfreð er markahæsti leikmaður hollensku úrvalsdeildarinnar með 14 mörk í 11 mörk. Hann hefur fjögurra marka forskot á þá Aron Jóhannsson hjá AZ Alkmaar og Graziano Pellè hjá Feyenoord.

Alfreð átti góða möguleika á því að bæta við mörkum á móti Go Ahead Eagles en liðið hefur fengið á sig 32 mörk í 13 leikjum.

Það er stutt í næsta leik á eftir en Heerenveen mætir ADO Den Haag á miðvikudaginn. Marco van Basten, þjálfari Heerenveen, vonast til að Alfreð verði klár í þann leik.