Lampard verður fyrirliði enska landsliðsins

Það verður enginn Steven Gerrard í enska landsliðinu gegn Síle annað kvöld. Þar af leiðandi þarf að finna nýjan fyrirliða á liðið.

Það mun koma í hlut Franks Lampard að bera bandið góða í leiknum geti hann spilað á annað borð. Hann er með smá kvef en ólíklegt er að hann láti kvef stoppa sig frá því að spila.

Hinn 35 ára gamli Lampard mun einnig vera heiðraður fyrir leik þar sem hann hefur náð þeim árangri að spila 100 leiki. 100. leikurinn kom gegn Úkraínu í síðasta mánuði.

Þó svo Gerrard spili ekki leikinn á föstudag þá er landsliðsþjálfarinn, Roy Hodgson, bjartsýnn á að Gerrard geti spilað vináttulandsleikinn gegn Þjóðverjum í næstu viku.