Vetrarblíða í Laugardalnum annað kvöld

„Allar áætlanir okkar hafa gengið upp þrátt fyrir mikinn vind og leiðindi,“ segir Jóhann Gunnar Kristinsson, vallarstjóri á Laugardalsvelli.

Flautað verður til leiks í viðureign Íslands og Króatíu í fyrri leik karlalandsliða þjóðanna um laust sæti á HM í Brasilíu klukkan 19 annað kvöld. Óvissa hefur verið um veður á leikdag og jafnvel rætt um að fresta gæti þurft leiknum. Þær áhyggjur virðast úr sögunni.

Þegar þetta er ritað hljóðar spáin annað kvöld upp á örlitla golu, litla sem enga úrkomu og hitastig í kringum tvö stig. Aðaláhyggjuefni vallarstjórans var að halda vellinum frostfríum. Af þeim sökum var leigður búnaður ásamt fjórum starfsmönnum frá Bretlandi til að verja völlinn.

Dúkurinn hefur legið yfir Laugardalsvelli í dag en ekki hefur verið blásið heitu lofti undir hann vegna hvassviðris. Jóhann Gunnar segir að reynt verði að lyfta dúknum og blása hita undir hann í nótt eða þá í fyrramálið.

„Við munum meta það á fundum okkar í fyrramálið hvenær rétt sé að taka dúkinn af vellinum,“ sagði Jóhann Gunnar í samtali við Vísi í kvöld. Hans vilji sé sá að halda dúknum á eins lengi og kostur er og þá sérstaklega ef kalt verður í veðri, rigning eða snjókoma.

„Hann yrði fjarlægður í síðasta lagi tveimur tímum fyrir leik,“ segir Jóhann Gunnar. Hann er ánægður með veðurspána fyrir morgundaginn og sömuleiðis sáttur með hvernig til hefur tekist að halda vellinum í standi fyrir stórleikinn á morgun.

Grasið á vellinum var slegið og línurnar málaðar kvöldið áður en dúkurinn var settur á undir lok síðustu viku.

„Völlurinn er í raun tilbúinn,“ segir Jóhann Gunnar.

Leikurinn annað kvöld hefst klukkan 19. Guðmundur Benediktsson lýsir honum beint á Bylgjunni auk þess sem bein textalýsing verður frá leiknum hér á Vísi.