Því meira kynlíf - því betra

Kannski finnst þér þú einfaldlega ekki hafa tíma fyrir kynlíf og veistu, það eru fleiri á sama báti. Óðagot og írafár 21. aldarinnar, ærandi streita og yfirvinna út í eitt, hafa tekið sinn toll af kynlífi fólks. Nýleg könnun sýndi að ekki einu sinni ein af hverjum þremur konum stundar kynlíf að minnsta kosti tvisvar í viku – sem til skamms tíma var meðaltalið – og 43 af hundraði líða fyrir litla kynhvöt.

Efnasambönd í sæði eru þunglyndum konum mikil geðbót

Við kynferðislega fullnægingu losar líkaminn fimmfalt meira magn en venjulega af kyrrðarhormóninu oxýtósín sem róar okkur niður fyrir svefninn. Samfarablossi hleypir líka af stokkunum endorfínbylgju sem lyftir andanum. Rannsóknir hafa sýnt að efnasambönd í sæði eru þunglyndum konum mikil geðbót – en þunglyndi veldur gjarnan svefnleysi. Svo virðist sem leggöngin taki upp næringarefnin sem finnast í sæði – sink, kalsíum, kalíum, frúktósa og ýmis prótín – og örfáum tímum síðar streyma þau óhindrað inn í blóðrásina.

Ef höfuðverkur veldur þér andvökum gætu kynmök verið rétta heilsubótin. Höfuðverkur stafar oftast af vöðva- og taugaspennu – oftast í höfði, öxlum, hálsi eða baki. Að ástaratlotunum loknum virkar gleðigjafinn endorfín eins og milt verkjalyf.

Kynlífið eflir sambandið

Kvef og nefrennsli geta verið þrálátur svefnþjófur eins og allir þekkja. Einnig hér eru hvílubrögð bjargvætturinn sem styrkja ónæmiskerfið til muna með því að ræsa losun mótefna í ónæmisneti slímhimnunnar í munni, lungum og meltingarvegi – og verja þannig blóðrásina fyrir árásum veira og gerla.

Hið mikilvægasta er þó að kynlífið færir þig nær ástvini þínum – í öllum skilningi. Ef þú nýtur hamingju með makanum eru áhyggjuefnin bæði færri og léttvægari þegar þú reynir að festa svefn að kvöldi. Reglan sýnist einföld; því meira kynlíf, því betra. Niðurstöður könnunar voru á þá leið að þeir sem eru iðnastir í bólinu eru ánægðari í einkalífi og starfi og kunna öðrum betur að halda streitunni niðri.

Þjálfaðu vöðvana

Þroskaðu kynferðislega fullnægingu – gerðu grindarbotnsæfingar. Með því að þjálfa vöðvana sem þú notar til að stýra þvagláti getur þú náð betri stjórn á líkamlegum viðbrögðum og haft meira yndi af samförum. Jafnt konur sem karlar geta þjálfað þessa vöðva. Bara spenna og slaka á vöðvunum hægt og rólega. Fyrst tíu sinnum en síðan allt að hundrað sinnum á dag (engar áhyggjur – engan grunar hvað gengur á).



* Greinin er úr bókinni Sofum betur - sjá nánar hér.