Nítján leikmenn á hættusvæði

Átta leikmenn Íslands eru einu gulu spjaldi frá því að fara í leikbann í undankeppninni. Fái þeir gult spjald í fyrri leiknum á Laugardalsvelli er ljóst að þeir missa af síðari leiknum í Zagreb.

„Það hafa alltof margir leikmenn okkar verið í banni í undankeppninni,“ segir Lars Lagerbäck. Jafnlítið land og Ísland megi ekki við því að margir leikmenn fari í leikbann.

„Agi leikmanna í undanförnum leikjum hefur þó verið til fyrirmyndar,“ segir Svíinn og tölfræði lýgur ekki.

Liðið hefur fengið fjögur gul spjöld í síðustu fjórum leikjum en átján gul og eitt rautt í leikjunum sex á undan. Birkir Már Sævarsson verður níundi leikmaðurinn sem tekur út leikbann hjá Íslandi í undankeppninni. Svíinn segir gulu spjöldin ekki munu hafa áhrif á liðsvalið í leiknum á Laugardalsvelli.

„Við munum velja besta liðið í fyrri leikinn óháð sjöldunum. Það er mikilvægt að að vinna fyrri leikinn heima. Til þess þarftu þitt sterkasta lið til að stjórna leiknum. Það væri líka yndislegt ef Króatar myndu ekki skora.“

Heimir Hallgrímsson, aðstoðarmaður Svíans, minnti á að gul spjöld væru ekki aðeins áhyggjuefni Íslendinga.

„Þeir eru með ellefu leikmenn á gulu spjaldi þannig að við getum ekki grátið yfir þessu,“ segir Heimir. Nítján leikmenn eru því á hættusvæði í fyrri leiknum.

Lagerbäck fagnar því að dómari leiksins, Alberto Undiano, er í hæsta gæðaflokki. Í fyrsta skipti í undankeppninni verður maðurinn með flautuna úr hæsta styrkleikaflokki dómara.

Þeir eru á hættusvæði

Aron Einar Gunnarsson

Sölvi Geir Ottesen

Gylfi Þór Sigurðsson

Alfeð Finnbogason

Kári Árnason

Eggert Gunnþór Jónsson

Emil Hallfreðsson

Kolbeinn Sigþórsson