Gylfi stefnir á að spila á morgun

"Það er smá stífleiki aftan í lærinu og það verður athugað með alvarleika þeirra meiðsla síðar í dag," sagði landsliðsmaðurinn Gylfi Þór Sigurðsson við Vísi í dag.

Gylfi hefur ekkert getað æft með íslenska landsliðinu fyrir leikinn gegn Færeyjum á morgun vegna meiðslanna.

"Ég spilaði á laugardaginn og á sunnudaginn fór ég að verða stífur. Það gerðist ekkert alvarlegt að ég held. Ég var að vonast til að þetta væri farið í dag en það er ekki alveg svo gott."

Gylfi er þó enn vongóður um að geta tekið einhvern þátt í leiknum á morgun.

"Það var tekin ákvörðun um að hvíla mig á æfingum en ég ætla að reyna að vera með fyrst ég er mættur alla leið hingað. Það er hundleiðinlegt að koma heim og gera ekki neitt nema hanga upp á hóteli. Það verða samt ekki teknar neinar áhættur."

Gylfi sagðist vera búinn að tala við lækna Tottenham og þeir höfðu engar áhyggjur af meiðslunum en vildu eðlilega fá að fylgjast með.