Íslendingur í Naíróbí - "Stöðugur straumur sjúkrabíla“

Stjórnvöld í Kenía segja að búið að frelsa flesta gíslana, sem hafa verið í haldi herskárra íslamista frá því á laugardag.

Meira en tíu manns hafi verið handteknir, eftir að her og lögregla réðust í morgun inn í verslunarmiðstöð í höfuðborginni Naíróbí, sem gíslatökumennirnir lögðu undir sig á laugardaginn.

Tveir gíslatökumanna hafa fallið í átökum í dag, en umsátrið hefur kostað meira en 60 manns lífið og hátt í tvö hundruð hafa særst.

Þórður Jónasson sérfræðingur hjá Alþjóðabankanum kemur reglulega til Nairobí og kom þangað í gær þar sem hann átti fund í fjármálaráðuneytinu.

„Maður sá það á flugvellinum, það var mikill viðbúnaður. Það voru vopnaðir hermenn sem tóku á móti farþegum. Það er minni umferð í bænum og mjög róleg yfir að lítast," segir hann.

Þórður segir þessa atburði hafa mikil áhrif á fólk í borginni og snerta ótrúlega marga persónulega. Fólk tali um að harmleikur hafi átt sér stað en ekki hryðjuverk. Hann sat fund með um hundrað samstarfsmönnum á skrifstofum Alþjóðabankans í borginni í dag.

„Það var verið að fara yfir þessa hluti, hvernig þetta væri. Svo var orðið gefið laust, og þá voru fjölmargir þar sem áttu ættingja og vini sem höfðu orðið fyrir skakkaföllum.“

Fórnarlömb árásana virðist vera af öllum þjóðernum sem og heimafólk.

„Kunningi bílstjóra míns var að keyra farþega þarna í gær og var með frásögn af því. Einn af hans farþegum hafði látið lífið, þannig þetta teygir anga sína víða.“

Þórður segir að allir sem hann hafi hitt séu miður sín yfir þessum atburðum. Eftir hádegi hafi síðan heyrst sprengingar og reykur stigið upp frá verslunarmiðstöðinni.

„Þá svona var talað um það að hermennirnir hefðu látið til skara skríða gegn þeim hryðjuverkarmönnum sem voru eftir í byggingunni. Svo tók ég eftir því þegar ég kom af skrifstofunni í dag, að leið sem tekur venjulega hálftíma að keyra tók tvær klukkustundir, því það var stöðugur straumur sjúkrabíla,“ sagði Þórður sem staddur er í Nairobi.