Stjórnarmenn RÚV ákvarða um eigið hæfi

Ný stjórn RÚV ohf mun taka ákvörðun um hvort einstakir stjórnarmenn standist hæfiskröfur -- stjórnin mun þannig dæma um eigið hæfi.

Aðalfundur stjórnar var haldinn á þriðjudaginn og hann sátu meðal annarra menntamálaráðherra, útvarpsstjóri, ný stjórn og ráðuneytisstjóri menntamálaráðuneytisins. Í framhaldi af því verður svo boðað til fundar nýrrar stjórnar, hún mun skipta með sér verkum og í framhaldinu mun stjórn svo taka afstöðu til og ákvarða um hæfi einstakra stjórnarmanna.

Fréttastofan hefur greint frá málefnum Láru Hönnu Einarsdóttur fulltrúa Pírata sem varamaður í stjórn, en lögfræðingi menntamálaráðuneytisins var gert að athuga hvort Píratar hafi vanrækt eftirlitsskyldu sína er varðar hæfi fulltrúa sinna í stjórnina. Svo er kveðið á um í lögum að stjórnarmenn megi ekki þiggja laun hjá öðrum fjölmiðlafyrirtækjum en Ríkisútvarpinu en Lára Hanna hefur starfað sem þýðandi hjá 365.