Ólafur Örn tekur við Fyllingsdalen

Ólafur Örn Bjarnason er á leið aftur til Noregs þar sem hann mun taka við C-deildarliði Fyllingdalen þar í landi.

Forráðamenn liðsins staðfestu þetta við norska fjölmiðla í dag en Ólafur Örn lék síðast með Fram hér á landi. Hann var áður spilandi þjálfari Grindavíkur en lék lengi sem atvinnumaður með Brann í Noregi.

Brann og Fyllingdalen eru bæði staðsett í Björgvin og er Ólafur Örn því á kunnulegum slóðum.

„Hann hefur ekki skrifað undir samninginn enn en hann gerir það þegar hann kemur um helgina,“ sagði Frank Hellevik en þriggja ára samningur mun liggja á borðinu.

Hellevik segir að Ólafur Örn vilji koma til Noregs til að bæta sig sem þjálfari en til stendur að hann muni stýra sinni fyrstu æfingu strax á mánudaginn.

Ólafur Örn mun ekki spila með Fyllingsdalen og því líklegt að hann hafi lagt knattspyrnuskóna á hilluna.