Zlatan skoraði tvö en Ronaldo skoraði þrjú og fór á HM

Cristiano Ronaldo skoraði þrennu þegar Portúgalir tryggðu sig inn á HM í Brasilíu með 3-2 sigri á Svíþjóð í Friends Arena í Stokkhólmi í kvöld. Portúgal vann því 4-2 samanlagt.

Þetta var einvígi Cristiano Ronaldo og Zlatan Ibrahimović fyrir leikina og ekki breyttist sú skoðun manna enda skoruðu þeir öll mörkin í leikjunum tveimur.

Cristiano Ronaldo stóð uppi sem sigurvegari, skoraði fjögur mörk í leikjunum tveimur og sigurmarkið í báðum leikjum.

Eftir markalausan fyrri hálfleik kom Cristiano Ronaldo Portúgal í 1-0 á 50. mínútu eftir frábæra skyndisókn og stungusendingu frá João Moutinho.

Von Svía var því veik en Zlatan Ibrahimović breytti því snögglega með tveimur mörkum á fjórum mínútum. Fyrra markið skoraði hann með skalla efir hornspyrnu frá Kim Källström og það seinna gerði hann með skoti beint úr aukaspyrnu.

Cristiano Ronaldo átti hinsvegar lokaorðið með því að skora tvö mörk á þremur mínútum og tryggja Portúgal endanlega sæti á HM.

Fyrra markið skoraði Ronaldo á 77. mínútu eftir sendingu Hugo Almeida en það síðara á 79. mínútu eftir að hafa sloppið í gegn eftir langa sendingu frá João Moutinho.