"Strákarnir hjá Rotherham eru öfundsjúkir“

Miðvörðurinn Kári Árnason var silkislakur á inniskónum þegar hann gaf sig á tal við blaðamann á hóteli íslenska landsliðsins í Zagreb í kvöld.

„Fyrir utan Kolla (Kolbein Sigþórsson) er staðan á okkur strákunum góð,“ sagði miðvörðurinn sem átti frábæran leik í hjarta íslensku varnarinnar í markalausa jafnteflinu í fyrri leiknum á föstudagskvöldið. Kári lét vel af ferðalaginu til Zagreb og vel hefði gengið að sofa um nóttina. Hins vegar hefði verið erfitt að ná sér niður aðfaranótt laugardags eftir leikinn. Úr varð um eins klukkustundar svefn. Hann væri þó á góðu róli í dag.

Vörn íslenska liðsins hefur fengið verðskuldað hrós fyrir frammistöðu sína í undanförnum leikjum. Liðið hefur fengið á sig tvö mörk í fjórum leikjum frá því Sviss skoraði fjögur mörk í Bern. Hvað hefur liðið bætt?

„Þetta er bara skipulagsatriði. Mér fannst við hafa spilað vel meirihlutann af þessari keppni. Það koma tveir leikir inn sem gera tölfræðina ekkert rosalega hagstæða fyrir varnarlínuna,“ segir Kári og á við 4-4 jafntefli í Sviss og 4-2 tapið gegn Slóvenum.

„Þegar verið er að sækja á bakvörðum og boltinn tapast erum við að fá á okkur skyndihlaup sem er ekkert voðalega gaman að glíma við á þessu stigi. Þá er oft refsað og við lentum í því í þessum leikjum. Við höfum lagað það svolítið að vega og meta hvenær við förum með bakverðina upp og það hjálpar mjög mikið.“

Fjölmargir leikmenn Íslands spila með stórum liðum í Evrópu. Má nefna Tottenham, Cardiff, Sampdoria og Ajax í því samhengi. Kári spilar hins vegar með Rotherham í ensku C-deildinni.

„Auðvitað myndi ég vilja vera að spila á hærra stigi og ég tel mig geta það. En hvað get ég gert?“ segir Kári léttur. Hann segir velgengni íslenska liðsins ekki hafa farið framhjá liðsfélögum sínum.

„Þeim finnst þetta jú frekar lygilegt. Ég er oft mjög feginn að fá að fara og taka þátt í þessu. Þeir eru eiginlega bara öfundsjúkir,“ segir Víkingurinn uppaldi.