Segir Börk hafa slasast í fangaflutningnum

Börkur Birgisson, sem hefur verið ákærður fyrir að verða Sigurði Hólm Sigurðarsyni að bana ásamt Annþór Kristjáni Karlssyni á Litla-Hrauni í maí á síðasta ári, verður fluttur undir læknishendur á morgun vegna meiðsla, sem lögmaður hans vill meina að hann hafi hlotið í fangaflutningum í síðustu viku.

Talið er að Börkur hafi rifið vöðva í öxl eftir að hann var fluttur frá Litla-Hrauni að Héraðsdómi Suðurlands þegar mál þeirra félaga var þingfest.

Lögmaður Barkar, Sveinn Guðmundsson, gagnrýnir flutning á Berki en sérsveitarmenn fylgdu Berki í Héraðsdóm Suðurlands en ekki fangaflutningamenn á vegum fangelsismálastofnunnar, eins og vanalega. Þá gagnrýnir lögmaður Barkar yfirvöld einnig sérstaklega vegna þess að Börkur mun vera með brjósklos og ekki hafi veirð tekið tillit til þess við flutningana.

Í sjónvarpsfréttum mátti sjá hvernig Börkur var dreginn út úr lögreglubíl, handjárnaður fyrir aftan bak, en sjaldgæft er að fangar séu handjárnaðir fyrir aftan bak þegar þeir eru fluttir í dómssal. 

Börkur var fluttur með sjúkrabíl til baka á Litla-Hraun eftir þingfestingu málsins. Nokkrum dögum síðar var læknir kallaður til, en sá mat ástand Barkar sem svo að hann hefði hugsanlega slasast í fangaflutningunum.

Því verður hann fluttur til læknis í fyrramálið, tæplega viku eftir að hann á að hafa slasast. Verjandi Barkar segist hafa farið sérstaklega fram á það að Börkur yrði fluttur eðlilega í Orkuhúsið í Reykjavík þar sem hann verður myndaður og segir um leið að flutningar á Berki hingað til séu án fordæma.

Fyrirtaka í dómsmálinu fer svo fram um miðjan júlí.