Öryrkjabandalagið skorar á stjórnvöld

Öryrkjabandalagið segir útreikninga Samtaka iðnaðarins vegna breytinga á nýrri reglugerð ekki standast og skora á stjórnvöld að fara ekki út í vanhugsaðar breytingar á reglugerðinni.

Öryrkjabandalagið heldur því fram að kostnaðaraukinn vegna reglugerðarinnar sé óverulegur og því fráleitt að hverfa frá því framfaraspori sem tekið var við gildistöku nýju reglugerðarinnar í fyrra.

Nýja reglugerðin byggir að hluta til á breyttri hugmyndafræði, svokallaðri algildri hönnun. Samkvæmt hugmyndafræðinni er þess krafist að við hönnun mannvirkja sé frá upphafi tekið mið af þörfum allra, þar á meðal fatlaðra og þeirra sem búa við skerta hreyfigetu.

Samtök iðnaðarins hafa mótmælt nýju reglugerðinni og vilja að aðrar kröfur verði gerðar til húsnæðis fyrir fatlaða og öryrkja.

Öryrkjabandalagið telur að með því að beina fötluðu fólki og fólki með skerta hreyfigetu í sér húsnæði án eðlilegs sambýlis við aðra landsmenn, sé stuðlað að aðskilnaðarstefnu.

Bandalagið telur að útreikningar Samtaka iðnaðarins um kostnað vegna nýju reglugerðarinnar standist ekki. Samtök Iðnaðarins hafa haldið því fram að kostnaðaraukinn sé 9,6 til 12,4%.

Öryrkjabandalagið segir að sú niðurstaða samtakanna sé hins vegar byggð á mati sem þau og Búseti létu gera á kostnaði við tiltekið hús sem aðilarnir völdu að nota.

Bandalagið segir að Mannvirkjastofnun hafi áður borið saman byggingarkostnað samkvæmt eldri reglugerð og og þeirri nýju og niðurstaðan var að um óverulega kostnaðarauka væri að ræða.

Mannvirkjastofnun fól óháðum aðila að leggja mat á kostnaðinn og var niðurstaðan að hækkunin væri á bilinu 2,2 til 3,1%.

Þá segir Öryrkjabandalagið að Umhverfisráðuneytið hafi jafnframt þegar ákveðið að gera tilteknar breytingar á byggingarreglugerðinni sem draga enn frekar úr hækkuninni.