Hólmbert búinn að skrifa undir hjá Celtic

Skoska stórliðið Celtic tilkynnti á vefsíðu sinni í dag að það væri búið að semja við íslenska unglingalandsliðsmanninn, Hólmbert Aron Friðjónsson.

Þessi tvítugi framherji kemur til félagsins frá Fram þar sem hann sló í gegn í vetur.

Fram kemur í fréttinni að Hólmbert hafi skrifað undir fjögurra ára samning við félagið og komi til þess um áramótin.

"Ég er í skýjunum að hafa samið við stórlið eins og Celtic. Það er draumur að rætast hjá mér. Það er ótrúlegt að vera hérna og ég get ekki beðið eftir því að byrja," segir Hólmbert í spjalli við heimasíðu Celtic.