Nígería komið á HM

Nígería varð í kvöld fyrsta Afríkuþjóðin til að tryggja farseðilinn sinn til Brasilíu fyrir úrslitakeppni HM næsta sumar.

Nígería hafði betur gegn Eþíópíu, 2-0, í síðari umspilsviðureign liðanna um laust sæti á HM. Nígería vann þar með 4-1 samanlagðan sigur.

Victor Moses, leikmaður Chelsea sem er nú í láni hjá Liverpool, skoraði fyrra mark Nígeríu í leiknum á 20. mínútu úr vítaspyrnu. Victor Obinna, sem leikur með Lokomotiv Moskvu, bætti því síðara við beint úr aukaspyrnu átta mínútum fyrir leikslok.

Þetta er í fimmta sinn alls sem Nígería kemst í lokakeppni HM en Lars Lagerbäck, landsliðsþjálfari Íslands, stýrði liðinu á HM í Suður-Afríku árið 2010.

Á næstu dögum kemur í ljós hvaða fjórar Afríkuþjóðir bætast í hóp HM-þjóða.