"Búin að upplifa nýja tilfinningu gagnvart mávum"

„Maður veit aldrei hvernig svona hlutir fara. Ég fann mjög fljótlega þegar ég steig á svið að fólk var að taka mér vel og ég fékk flottar einkunnir frá dómnefndinni. Það gaf í skyn að við værum að fara í toppslaginn," segir söngkonan Hera Björk sem stóð uppi sem sigurvegari með lag ársins í Vina del Mar keppninni.

Hera var í viðtali hjá Ívari Guðmundssyni á Bylgjunni í morgun og greinilega í skýjunum með sigurinn glæsilega.

„Þetta var bara æðislegt. Maður er búinn að upplifa alveg nýja tilfinningu gagnvart mávum verð ég að segja," segir Hera Björk og hlær. Verðlaunagripurinn sem Heru hlotnaðist var einmitt silfurmávur. Auk þess fékk hún 35 þúsund dollara í sinn hlut eða rúmar fjórar milljónir króna.

„Þetta er alveg heilagur fugl hérna í Vina del Mar. Er í bæjarmerkinu og allt," segir Hera Björk sem hefur notið lífsins í Suður-Ameríku.

„Þetta er búið að vera tveggja vikna vinna en rosalega gaman. Ég hef unnið og kynnst æðislegu fólki. Nú er maður kominn með bransamálið á spænsku," segir Hera og hlær.

„Maður kann að segja ýmislegt. Maður lærir hægt og rólega hvað maður þarf að kunna til þess að koma sér áfram," segir Hera. Hún telur líklegt að hún sé fyrsti keppandinn frá Norðurlöndum í sögu keppninni.

„Ég er allavega sú fyrsta frá Íslandi. Þeir eru rosalega forvitnir um Ísland og vita ekki alveg hvar það er á jarðarkringlunni," segir Hera Björk. Að sögn Heru voru mörg frábær lög í keppninni og samkeppnin mikil.

„Lagið frá Panama er mjög flott, ekta Bylgjulag. Svo var „power-ballaða" frá Ameríku sem límdist á heilann á manni. Æðislega falleg ballaða frá Venesúela. Bara mjög flott og fambærileg lög úr öllum áttum," segir Hera Björk sem reiknar með því að nýta sér meðbyrinn í kjölfar sigursins.

„Það mun koma í ljós. Við ætlum að nýta tækifærið sem við erum komin með í hendurnar. Með allan þennan fjölda fólks sem var að horfa, um hundrað milljónir horfðu á keppnina og að standa uppi sem sigurvegari gerir það að verkum að lagið er að fara í mikla spilun hérna," segir Hera Björk sem er strax farin að hugsa næstu skref.

„Við eigum fullt af flottum lögum. Bæði á ég gömul lög og svo bara íslensk lög, gamlar fallegar íslenskar perlur, sem hægt er að syngja á spænsku og gera eitthvað skemmtilegt með í samstarfi við íslenska lagahöfunda," segir Hera Björk.