Fordæmd fyrir nasistagrín – aftur!

Grínistinn Joan Rivers gekk fram af meðlimum í Anti-Defamation League, sem berst gegn óhróðri gegn Gyðingum, þegar hún gerði grín að kjólnum sem fyrirsætan Heidi Klum klæddist í Óskarspartíi Elton John.

Heidi er eins og flestir vita frá Þýskalandi og klæddist afar flegnum síðkjól frá Julien Macdonald í teitinu. Joan fann sig knúna til að tjá sig um dressið í þættinum Fashion Police á sjónvarpsstöðinni E!

"Síðast þegar Þjóðverji var svona heitur var þegar þeir voru að ýta Gyðingunum inn í ofnana," sagði Joan og vísaði í líkbrennsluofna sem notaðir voru í útrýmingabúðum nasista.

Abraham Foxman í Anti-Defamation League finnst ummælin gróf og mjög niðrandi fyrir Gyðinga og þá sem lifðu helförina af.

"Joan Rivers af öllum ætti að vita betur. Enginn annar í þættinum [Giuliana Rancic, Kelly Osbourne og George Kotsiopoulos] fordæmdi þessa hegðun hennar," segir Abraham sem er búinn að krefjast afsökunarbeiðni frá E! og að þátturinn Fashion Police verði tekinn af dagskrá.

Joan er sjálf Gyðingur og stendur með skrítlunni en hún komst líka í hann krappann í fyrra þegar hún líkti versluninni Costco við Þýskaland á nasistatímum.

"Eiginmaður minn missti meirihluta fjölskyldu sinnar í Auschwitz og ég get fullvissað ykkur um það að ég hef alltaf minnt fólk á helförina með húmor," segir Joan en eiginmaður hennar Edgar Rosenberg framdi sjálfsmorð árið 1987.

Þú gætir unnið - vertu með okkur á Facebook.