Boilesen tryggði Dönum sigur í blálokin

Nicolai Boilesen, liðsfélagi Kolbeins Sigþórssonar hjá Ajax, tryggði Dönum 2-1 sigur á Norðmönnum í vináttulandsleik í kvöld en markið kom á 90. mínútu leiksins.

Nicolai Boilesen er 21 árs gamall og var að skora sitt fyrsta landsliðsmark en hann skoraði dauðafrír á fjærstöng eftir sendingu Peter Ankersen.

William Kvist kom Dönum í 1-0 á 13. mínútu eftir hornspyrnu Christian Eriksen en Marcus Pedersen jafnaði metin á 78. mínútu eftir sendingu Morten Gamst Pedersen.

Hvorug þjóðin komst upp úr sínum riðli og eru því báðir landsliðsþjálfarar farnir að hugsa um næstu undankeppni.