MR-ingar fögnuðu sigrinum vel

„Þetta er bara sviðsett mynd. Gripurinn er þannig hannaður að það er hægt að taka hljóðnemann af," segir Þorsteinn Gunnar Jónsson úr Gettu Betur liði MR.

MR-ingar unnu sigur í spurningakeppni framhaldsskólanna í átjánda skipti í gærkvöldi. Menntaskólinn í Hamrahlíð varð að játa sig sigraðan 32-27.

Menntskælingar úr miðbænum fögnuðu sigrinum að vonum vel og hefur ljósmynd af Þorsteini Gunnari og liðsfélaga hans, Grétari Guðmundi, farið sem eldur í sinu um netheima í dag. Virðist sjálfur verðlaunagripurinn, Hljóðneminn margfrægi, hafa brotnað í fagnaðarlátunum og Þorsteinn í sérstaklega annarlegu ástandi.

„Þetta er bara sviðsett mynd. Gripurinn er þannig hannaður að það er hægt að taka hljóðnemann af. Við ákváðum að taka mynd eins og við hefðum farið alltof harkalega í djammið í gær," segir Þorsteinn og hlær.

Hann segir sérstaklega skemmtilegt að fólk hafi tjáð sig um atvikið og skammað þá fyrir hegðun sína. Þetta hafi einfaldlega verið brandari af þeirra hálfu.

Fundu ekki fyrir pressunni

Allir liðsmenn MR-liðsins voru að keppa í Gettu Betur í fyrsta skipti. Þorsteinn og Grétar Guðmundur gegndu hlutverki liðsstjóra í fyrra en Grétar Þór Sigurðsson hafði ekki neina reynslu af keppninni.

Þorsteinn segir MR-inga ekki hafa fundið fyrir mikilli pressu þótt liðið hafi átt titil að verja og hafi verið sérlega sigursælt í gegnum tíðina.

„Við fundum ekki fyrir neinni svaka pressu. Einmitt af því við vorum í fyrsta skipti," segir Þorsteinn. Hann bendir á að tveir liðsmanna sigurliðs MR í fyrra hafi hætt í liðinu og því hafi komið nokkuð óvænt upp að þeir tækju sæti þeirra.

Þorsteinn segist meira að segja hafa heyrt efasemdaraddir innan skólans að í ljósi aðstæðna væri jafnvel borin von að liðið kæmist í átta liða úrslitin þegar sjónvarpsútsendingar frá keppninni hefjast. Pressan hafi því líkast til verið minni en á fyrri MR lið.

Þorsteinn þakkar góðum árangri þremenninganna í hraðaspurningum því að sigur hafðist á góðu liði MH. MR-ingar svöruðu 24 af 26 spurningum rétt í hraðaspurningum sem er hæsta skor í keppninni síðan árið 2006.

Þorsteinn og Grétar Guðmundur eru í 6. bekk og útskrifast því í vor gangi allt samkvæmt áætlun. Grétar Þór er hins vegar í 5. bekk og gæti því skipað lið MR-inga í titilvörninni á næsta skólaári.