MR vann Gettu Betur

Menntaskólinn í Reykjavík sigraði í spurningakeppni framhaldsskólanna, Gettu Betur, í 18. skipti í kvöld eftir hörkuviðureign gegn liði Menntaskólans við Hamrahlíð.

MR-ingar höfðu yfir að loknum hraðaspurningum og létu forystuna aldrei af hendi þó aldrei hafi hún verið afgerandi. Lokatölurnar urðu 32-27 MR í vil sem hampaði hljóðnemanum margfræga.

MH keppti í úrslitum í fimmta skipti en liðinu hefur enn ekki tekist að landa verðlaunagripnum eftirsótta.

Lið MR var skipað þeim Grétari Guðmundi Sæmundssyni, Þosteini Gunnari Jónssyni og Grétari Þór Sigurðssyni.