Fjórir af sjö lausir úr gíslingu

Fjórir af sjö hjálparstarfsmönnum voru í gær látnir lausir í Sýrlandi, eftir að hafa verið í haldi gíslatökumanna frá því á sunnudag.

Þrír þeirra eru frá Rauða krossinum en einn frá Rauða hálfmánanum. Enn eru þrír starfsmenn Rauða krossins í haldi gíslatökumannanna.

Óljóst er hverjir stóðu að verki en fólkinu var rænt skammt Saraqeb í Idlib-héraði norðvestan til í landinu. Fjórum hinna rændu var svo sleppt við tyrknesku landamærin í gær.

Rauði krossinn segir í yfirlýsingu að mannrán sem þessi geti grafið undan hjálparstarfi í Sýrlandi, en bæði Rauði krossinn og Rauði hálfmáninn vinna hörðum höndum að því að útvega nauðstöddu fólki í Sýrlandi brýnustu aðstoð.

Yfirmaður vopnaeftirlitssveitar Sameinuðu þjóðanna, sem nú er stödd í Sýrlandi, segir sömuleiðis að átökin í landinu torveldi starf sveitarinnar. Einkum hafi reynst erfitt að fá aðgang að efnavopnum á sumum þeirra svæða sem uppreisnarmenn hafa á valdi sínu.