NSA safna milljónum tenglalista

Þjóðaröryggisstofnun Bandaríkjanna, NSA, hefur safnað milljónum tenglalista í tölvupóst- og spjallforritum um allan heim í þeim tilgangi að finna hugsanleg tengsl við hryðjuverkastarfsemi og annað glæpsamlegt athæfi.

Þetta kemur fram í leynilegum skjölum sem uppljóstrarinn Edward Snowden lak og hafa yfirmenn leyniþjónustunnar staðfest það.

Upplýsingaöflunin hefur verið tölvustýrð og ekki beint að ákveðnum einstaklingum heldur fjöldanum. Á einum degi í fyrra safnaði NSA 444.743 tenglalistum frá Yahoo, 105.068 frá Hotmail, 82.857 frá Facebook, 33.697 frá Gmail og 22.881 frá öðrum.

Er þetta sagður dæmigerður fjöldi á dag en að auki er NSA sagt safna tenglum frá um 500 þúsund vinalistum í spjallforritum.