Bandaríkjamenn styrkja Filippseyinga um 3 milljarða til viðbótar

John Kerry, utanríkisráðherra Bandaríkjanna, hefur gefið það út að Bandaríkjastjórn ætli að auka við aðstoð sína við nauðstadda á Filippseyjum.

Kerry kom til borgarinnar Tacloban, sem varð verst úti í fárviðrinu í síðasta mánuði, og kvaðst utanríkisráðherrann aldrei hafa séð annað eins.

Um átta þúsund manns létust er fellibylurinn Haiyan fór yfir landið en fimm þúsund manns létust í Tacloban.

John Kerry gaf það út í morgun að Bandaríkjastjórn ætli sér að auka við framlag sitt til Filippseyinga um 25 milljónir dollara, sem samsvarar um þremur milljörðum íslenskra króna. Alls hafa Bandríkjamenn gefið tíu milljarða íslenskra króna til Filippseyinga frá hamförunum.