Geir: "Launin eru trúnaðarmál“

Ljóst er að kostnaðurinn við karlalandslið Íslands í knattspyrnu mun aukast með því að hafa tvo landsliðsþjálfara í starfi.

Geir Þorsteinsson, formaður KSÍ, staðfesti á fundi með blaðamönnum í dag að innihald samningsins við þjálfarana væri trúnaðarmál.

„Samningurinn var algjörlega innan þeirra marka sem stjórn KSÍ ákvað,“ sagði Geir um þá peninga sem þurfti til að sannfæra Svíann um að vera áfram. Hann bætti því við að nú væri Heimir Hallgrímsson kominn í fullt starf hjá sambandinu og kostnaðurinn við liðið því meiri.

Geir bætti við að í hans tíð hjá KSÍ hefði stjórn sambandsins aldrei átt jafnauðvelt með að taka ákvörðun um mann eða menn í stöðu landsliðsþjálfara.