Á enn tæp þrjú ár í að jafna Gumma Hreiðars

Hinn fimmtugi Kevin Poole verður á varamannabekknum í kvöld þegar Burton Albion mætir Mansfield Town í ensku D-deildinni í fótbolta.

Kevin Poole er markvarðarþjálfari Burton en verður að taka að sér varmarkvarðarstöðuna þar sem að Sunderland kallaði aftur á markvörðinn Jordan Pickford sem var í láni hjá Burton Albion.

Kevin Poole er fæddur í júlí 1963 og á að baki 123 leiki fyrir Burton Albion en hann kom til félagsins þegar hann var 43 ára gamall árið 2006. Poole á yfir 160 leiki fyrir Leicester City á árun7um 1991 til 1997.

Kevin Poole slær þó ekki við Guðmundi Hreiðarssyni sem var á bekknum hjá Íslandsmeisturum KR í sumar. Guðmundur var í svipaðri stöðu og Poole enda markmannsþjálfari KR.

Guðmundur er fæddur í október 1960 en var því tæplega 53 ára á bekknum þegar KR mætti FH í Pepsi-deildinni í ágúst. Hannes Þór Halldórsson tók þá út leikbann og Rúnar Alex Rúnarsson stóð í markinu.

Guðmundur Hreiðarsson varð Íslandsmeistari með tveimur félögum á ferlinum, fyrst með Val 1987 og svo með Víkingi 1991. Hann var í marki KR í einum leik sumarið 1996 þá sem varamarkvörður Kristjáns Finnbogasonar.