Real Madrid tekur enga áhættu með Cristiano Ronaldo

Cristiano Ronaldo verður ekki með Real Madrid á móti Real Valladolid í spænsku úrvalsdeildinni í fótbolta um helgina og það lítur út fyrir að kappinn spili ekki næst fyrr en 14. desember næstkomandi.

Ronaldo fór af velli um síðustu helgi vegna meiðsla aftan í læri og var ekki með í sigri á Galatasaray í Meistaradeildinni í vikunni. Carlo Ancelotti, þjálfari Real Madrid, ætlar nú að nota tækifærið og gefa Cristiano Ronaldo nauðsynlega hvíld.

„Hann fór í myndatöku og vöðvinn er orðinn alveg heill en hann er ekki orðinn nógu ánægður með sig. Hann hefur ekki æft mikið að undanförnu og við viljum ekki taka neina áhættu. Hann hefur nú tvær vikur til að undirbúa sig fyrir næsta leik," sagði Carlo Ancelotti á blaðamannfundi.

Cristiano Ronaldo missir eins og áður sagði af leikum um helgina og verður síðan í leikbanni í bikarleik um næstu helgi. Real Madrid er komið áfram í Meistaradeildinni og því mun liðið örugglega hvíla Ronaldo í lokaleik riðlakeppninnar á móti FC Kaupmannahöfn.

Cristiano Ronaldo skoraði í sjö síðustu leikjum sínum fyrir meiðslin (með Real Madrid og landsliði Portúgals) og samtals 14 mörk. Hann hefur nú skorað 25 mörk í 18 leikjum í öllum keppnum með Real Madrid á leiktíðinni.