Skilvirkni Alfreðs fyrir framan markið áður óþekkt

Alfreð Finnbogason er markahæsti leikmaður hollensku úrvalsdeildarinnar í knattspyrnu með fjórtán mörk að loknum tólf umferðum.

Landsliðsframherjinn stimplaði sig inn hjá hollenska liðinu í fyrra þegar hann skoraði 33 mörk á leiktíðinni og varð þriðji markahæsti í deildinni með 24 mörk.

Frá því Alfreð mætti til leiks hjá Heerenveen hefur hann skorað 59,5 prósent af öllum mörkum liðsins að því er fram kemur á heimasíðu félagsins. Þar segir að um áður óþekkta tölfræði sé að ræða. Haldi hann uppteknum hætti er markamet Afonso Alves, 34 mörk í bláa og hvíta búningnum, í hættu.

Alfreð hefur nú þegar jafnað markafjölda sinn frá því þegar deildin var hálfnuð í fyrra. Munurinn er hins vegar sá að Alfreð hefur enn sex leiki til þess að bæta við mörkum áður en leiktíðin verður hálfnuð.

Alfreð er í landsliðshópi Íslands fyrir leikina gegn Króötum á föstudag og þriðjudag.