Segir kröfu að stjórnin segi af sér komist Króatar ekki á HM

„Það er mikill hiti og mikið rætt um þennan leik. Það er krafa frá þjóðinni að stjórn knattspyrnusambandsins segi af sér komist Króatar ekki á HM,“ segir Lúkas Kostic.

Lúkas ræddi málin við strákana í Reykjavík Sídegis í dag. Hann er alinn upp í Króatíu en flutti til Íslands árið sem bjórinn var leyfður, árið 1989. Hann spilaði með Þór, ÍA og Grindavík áður en hann sneri sér að þjálfun.

„Við (Íslendingar) erum virkilega ánægðir með árangur okkar landsliðs á meðan þeir eru ósáttir við sína stöðu að þurfa að fara í umspil.“

Lúkas telur möguleika íslenska liðsins góða gegn Króötum. Fjölmargir leikmanna Króata séu ekki í góðu leikformi enda ekki með fast sæti í byrjunarliðum félagsliða sinna.

„Við eigum gæðin og spilum á jafnréttisgrundvelli gegn Króötum. Ég held að króatíska þjóðin sé ekki meðvituð um það.“

En með hverjum heldur Lúkas á föstudaginn?

„Auðvitað eru tilfinningar mínar báðum megin. Æska mín er í Króatíu en ég hef nánast unnið með hverjum einasta landsliðsmanni í yngri landsliðum og hef sterkar taugar til þeirra í þessum leik.“