Króatarnir eru mættir

Leikmenn króatíska landsliðsins í knattspyrnu og fylgdarlið eru mætt til landsins. Króatar mæta Íslendingum á föstudag í fyrri umspilsleik þjóðanna um sæti á HM næsta sumar.

Flugvél með leikmenn liðsins og félaga innanborðs lenti á Keflavíkurflugvelli um kvöldmatarleytið eða fimm mínútur fyrir sjö. Þaðan tekur liðið rútu til Reykjavíkur þar sem það mun dvelja á hóteli í námunda við Laugardalinn.

Óvíst er hvernig æfingu liðsins á morgun verður háttað og sömu sögu er að segja um æfingu íslenska liðsins. Veðurspá er ekki sérstök og ljóst að það væri Laugardalsvelli í hag að ekki yrði æft á honum á morgun. Ákvörðun um hvort staðsetning æfinganna verði færð á morgun er í höndum eftirlitsmanns frá Alþjóðaknattspyrnusambandinu.