Aron Einar nýtti útivistarleyfið og kíkti á handboltaleik

Landsliðsfyrirliðinn Aron Einar Gunnarsson fylgdist með sínum mönnum í liði Akureyrar sem töpuðu á dramatískan hátt gegn Frömurum í Olísdeild karla í handbolta í kvöld.

Aron Einar, sem er að upplagi Þórsari og þótti afar efnilegur handboltamaður á sínum tíma, hafði það náðugt í stúkunni sólarhring fyrir stórleikinn gegn Króatíu í Laugardalnum annað kvöld. Aron Einar hafði augun töluvert á úri sínu og líklegt að hann hafi verið að nýta síðustu mínúturnar áður en hann átti að vera mættur upp á hótel ásamt öðrum landsliðsmönnum Íslands.

Kristján Þór Júlíusson, heilbrigðisráðherra, missti heldur ekki af tækifærinu til að sjá sína menn gegn Fram. Kristján Þór er fyrrum bæjarstjóri Akureyrar.

Valgarður Gíslason, ljósmyndari Fréttablaðsins og Vísis, var í Safamýri og myndaði kappana á hliðarlínunni.