Kolbeinn líklega óbrotinn

Kolbeinn Sigþórsson fór í myndatöku á Landspítalanum í gær og liggja niðurstöður hennar ekki enn fyrir. Samkvæmt heimildum Vísis er hann þó óbrotinn.

Kolbeinn fór meiddur af velli undir lok fyrri hálfleiks í leik Íslands og Króatíu í gær eftir að hafa misstigið sig illa á ökklanum. Skömmu eftir leik var greint frá því að liðbönd væru slitin en sú frétt reyndist ekki rétt.

Það er enn of snemmt að segja til um hvort að Kolbeinn muni missa af síðari leiknum gegn Króatíu en hann fer fram á þriðjudaginn. Það hefur þó ekkert verið útilokað um þátttöku hans.

Þeir leikmenn sem spiluðu ekki með íslenska landsliðinu í gær munu æfa á Samsung-vellinum í Garðabæ síðar í dag. Landsliðið heldur svo utan til Króatíu á morgun.