Khedira með slitið krossband | HM í hættu

Sami Khedira verður frá næsta hálfa árið en í ljós kom að hann sleit krossband í hné í vináttulandsleik Þýskalands og Ítalíu í Mílanó í gær.

Joachim Löw, landsliðsþjálfari Þýskalands, staðfesti eftir leikinn að Khedira þyrfti að fara í aðgerð.

„Þetta eru mikil vonbrigði fyrir Sami. En hann hugsar ávallt jákvætt og ég hef trú á því að hann verði tilbúinn þegar að HM hefst í sumar,“ sagði Löw.

Khedira meiddist þegar hann fór í tæklingu gegn Andrea Pirlo, leikmanni ítalska landsliðsins, en Þýskaland þykir með sigurstranglegri liðum fyrir HM í Brasilíu næsta sumarið.

Þetta er einnig áfall fyrir Real Madrid en Khedira gekk í raðir félagsins árið 2010.