Búið að selja 13 þúsund miða á leikinn

Fjölmiðlafulltrúi króatíska knattspyrnusambandsins útilokaði í samtali við Vísi í dag að uppselt yrði á landsleik Króata og Íslands á þriðjudagskvöldið.

Forseti Knattspyrnusambandsins, Davor Suker, staðfesti um helgina að búið væri að selja 9000 miða á leikinn. Fjölmiðlafulltrúinn sagði í samtali við Vísi í dag að sala hefði aðeins aukist og nú væru 13000 miðar seldir.

„Það er samt þannig í Króatíu að miðar seljast best á leikdegi,“ sagði fjölmiðlafulltrúinn við Vísi. Aðspurður hvort það yrði uppselt hristi hann hausinn og sagði það ekki í spilunum.

Íslenska liðið æfði á Maksimir-vellinum í dag en króatíska landsliðið æfir síðdegis. Flautað verður til leiks klukkan 20.15 að staðartíma annað kvöld eða 19.15 að íslenskum tíma. Leikurinn verður í beinni textalýsingu á Vísi auk þess sem Gummi Ben lýsir leiknum beint á Bylgjunni.