Strákarnir tóku vel á því í Zagreb | Myndir

Allir leikmenn karlalandsliðs Íslands í knattspyrnu tóku þátt í æfingu liðsins á Maksimir-leikvanginum í Zagreb í Króatíu í dag.

Leikmönnum gekk misvel að festa svefn í nótt eftir ferðalagið frá Íslandi. Sumir sofnuðu í vélinni sem hjálpaði ekki til en vafalítið spilar inn í að spennan hjá leikmönnum liðsins, líkt og fjölmörgum landsmönnum, er mikil.

Landsliðsþjálfarinn Lars Lagerbäck var ánægður að æfingunni lokinni. Hann sagði æfinguna aðallega hafa snúist um að hlaupa úr sér þreytu, leikmenn væru kannski ekki alveg 100 prósent búnir að jafna sig en þeir yrðu klárir í slaginn á morgun.

Strákarnir virkuðu í það minnsta eldhressir á æfingunni sem Vilhelm Gunnarsson, ljósmyndari Fréttablaðsins og Vísis, myndaði í bak og fyrir í dag. Leikurinn annað kvöld hefst svo klukkan 19.15 að íslenskum tíma.