Lars lofar að ræða ekki við önnur knattspyrnusambönd

Landsliðsþjálfarinn Lars Lagerbäck gefur ekkert uppi um hvort hann verði áfram í brúnni hjá karlalandsliði Íslands í knattspyrnu að undankeppninni lokinni.

Lagerbäck svaraði spurningu blaðamanns Vísis á þann veg að hann vonaðist til þess að liðið kæmist í lokakeppni HM. Þá þyrfti ekkert að taka þá ákvörðun strax enda myndi Svíinn alltaf stýra liðinu í Brasilíu ef til þess kæmi. Annars muni hann setjast niður með Geir Þorsteinssyni, formanni KSÍ, og Þóri Hákonarsyni, framkvæmdastjóra KSÍ.

„Ég sagði fyrir leikina gegn Króötum að ef við kæmumst ekki áfram munum við setjast niður og ræða saman. Eins og ég sagði við Geir og Þóri þá mun ég ekki ræða við neinn áður en við setjumst niður og ákveðum framtíðina.“