Messi óáttur með samsæriskenningarnar

Lionel Messi er ekki ánægður með tilraunir spænskra blaðamanna til að finna hinar ýmsu ástæður fyrir því að hann sé að meiðast aftur og aftur. Messi er á því að þetta sé bara óheppni.

Messi tognaði enn á ný aftan í læri á dögunum og Barcelona hefur gefið það út að hann spilar ekki fleiri leiki á árinu 2013. Þetta var í fimmta sinn á sex mánuðum þar sem að hann tognar á vöðva.

Spænskir og argentínskir fjölmiðlar hafa skrifað um það að möguleg ástæða fyrir síendurteknum meiðslum séu breytingar á læknaliði Barcelona en það var frétt um það í Argentínu að Messi hafi leitað sér læknisaðstoðar þegar hann kom heim í einu landsliðshléinu.

„Ég er leiður yfir þessu því ég bjóst ekki við þessu. Ég er líka pirraður yfir því að þetta hafa meiðsli í kjölfarið á öðrum meiðslum. Ég hef samt engar áhyggjur því svona hlutir gerast. Það er ekkert óvenjulegt á bak við þessi meiðsli. Fólki getur talað og talað en þessi meiðsli eru bara óheppni," sagði Lionel Messi við argentínska blaðið Ole.

„Fólk veit bara ekki hvað það er að tala um. Juanjo er ennþá sjúkraþjálfarinn hjá Barcelona og þeir hafa meira segja hækkað hann í tign og hann er nú yfir deildinni," sagði Messi sem er ekki tilbúinn að giska á það hvenær hann kemur til baka.

„Ég kem bara í baka þegar líkaminn segir mér að hann sé tilbúinn," sagði Messi.