Jurgen Klinsmann orðaður við landsliðsþjálfarastöðu Sviss

Svissneska knattspyrnusambandið hefur hafið leit að næsta landsliðsþjálfara landsliðsins í knattspyrnu og hefur nafn Jurgen Klinsmann, landsliðsþjálfara Bandaríkjanna, borið á góma innan sambandsins.

Ottmar Hitzfeld, núverandi þjálfari Sviss, hefur staðfest að hann ætli sér að hætt alfarið í þjálfun eftir heimsmeistaramótið í Brasilíu á næsta ári en liðið tryggði sér sæti á mótinu á dögunum.

Sviss var með Íslandi í riðli í undankeppninni og vann liðið riðilinn. Ísland komst áfram í umspilið.

Samkvæmt heimildum Blick, tímarit sem staðsett er í Zurich, er Jurgen Klinsmann einn af helstu kostum sambandsins en samningur hans við bandaríska sambandið rennur út eftir mótið í Brasilíu.

Klinsmann sagði í fjölmiðlum í september að hann hefði áhuga á að halda áfram með bandaríska liðið en svissneska sambandið mun að öllum líkindum reyna að sannfæra Þjóðverjann um að taka við svissneska liðinu.

Það er því spurning hvort Aron Jóhannsson, leikmaður bandaríska landsliðsins, fái nýjan landsliðsþjálfara eftir heimsmeistaramótið.